السبب الأول لأي قراء خاطئ هو الغضب ….
مافي شي بالدنيا أسوأ من الغضب , قرارات الغاضب بتكون مشحونة بمشاعر الغيض , الغضب بخلي على عيون الغاضب غشاوة , بتخلي الرؤية ضبابية و مشوهة لأبعد الحدود , فكيف ممكن لحدى ما عبشوف منيح انه ياخد قرار صح , أكيد القرار رح يكون خاطئ .
احذر من الغضب عند اتخاذ القرار , و اذا كنت غضبان أجل عملية اتخاذ القرار لبعد ما تروق و تهدى , كتير قرارات اتخذها أصحابها بلحظة غضب و ندموا بعدين , و الأمثلة كثيرة , رجل طلق زوجته بساعة غضب بعد ساعتين ندم و صار يترجاها ترجع , أب طرد ابنه من البيت , و بعد يومين صار يدور عليه كرمال يرجعه , أم نهرت بنتها لسبب تافه و بسيط بساعة غضب , خسرتها حطت حاجز بينها و بين بنتها بلحظة غضب .
اذا لما تكون غضبان أوعك تأخذ أي قرار مهما كان صغير و عادي , أجله لحين تكون أكثر هدوءا وسكينة .
السبب الثاني من الأسباب اللي بتخلينا ناخد قرارات خاطئة هو الإرهاااااااااق ..
تخيل معي ذهن متعب , مليء بالشحنات السلبية كيف ممكن تاخد قرار و انت بهيك حالة ؟
التوتر , ضغوطات العمل , ضيق الوقت , بخلينا أحيانا ناخذ من غير ما نعطيها حقها من التفكير , هي القرارات بالتأكيد رح تكون خطأ بمجملها و رح نندم عليها , لهيك لا تعطي قرار و انت تعبان , خود إجازة ريح ذهنك فكر مليا , و بعدين خود القرار عشان ما تندم عليه بعدين .
السبب الثالث و الكارثي في اتخاذ قرارات خطأ هو , اتباع الهوى ..
قرار مبني بشكل كامل على الرغبات و الميول و المشاعر , هو قرار عاطفي خاطئ بالمجمل , رأيك على عيني بس كمان رأي المنطق و العقل , رأي الناس اللي حواليك مهم كمان ما تتجاهله و خليهم يساعدوك لأنه وجهات نظرهم كمان مهمة و مفيدة , و ما خاب من استشار .
الآن إلى السبب الرابع للقرارات الخاطئة و هو , الخوف و الرهبة :
كتير ناس عندها الإمكانية لتاخذ قرارات بتعمل إلها نقلات نوعية و لكنهم بخافو من هذا الشيء و بفكرو بطريقة سلبية .
الخوف بخلي الإنسان مضطرب و بخليك تأخذ قرار غير صحيح , طيب من شو منخاف ؟
منخاف أكثر شي من التجارب السابقة , فشل التجارب السابقة ما تفكر فيه على إنه فشل , فكر فيه على انه تجربة خطأ , و كمل و ادخل بقرار جديد و تجربة جديدة , لا تيأس و تقول أنا مافيني .
امسح سحابة التشاؤم من دماغك و فكر بشكل إيجابي و لا تخاف من القرار اللي رح تاخدو بعد تفكير و تخطيط لإنه بالمجمل رح يكون قرار صحيح .
أما السبب الخامس للقرارات الخاطئة فهو المؤثر الخارجي :
نحن نعيش في بيئة اجتماعية مليئة بالمؤثرات الخارجية , مشاكل شخصية , مشاكل العمل , ضغوطات الحياة و و و الكثير الكثير .
لكن نصيحتي لكم , لا تسمحوا للعلاقات الشخصية بالتأثير على عمليات اتخاذ القرار , خليني أعطيك مثال بسيط عشان نفهم فكرة المؤثر الخارجي .
اجتك فرصة عمل في دولة أخرى , فرصة رائعة و انت أمام اتخاذ قرار , تترك أهلك و تسافر أو تضل ببلدك و تضيع الفرصة .
تأثير المؤثر الخارجي هون كتير كبير و مسبب ضغط و توتر عالي , بس القرار الصح اللي رح تاخده بهل الحالة مارح يكون سليم الا اذا فصلت بين القرار و بين المؤثر الخارجي و هو الأهل .
آخر سبب للقرار الخاطئ هو المثالية الزائدة , إي نعم المثالية الزائدة سبب للقرارات الخاطئة .
كيف ؟
خود مثلا مدير لازم ياخد قرار معين بس ما بيتخذه قبل ما يتأكد انه صحيح 100 %
خالي من العيوب 100 %
يصب في مصلحة الجميع 100 %
مافي أي مخاطرة , نسبة المخاطرة 0 % ..
بتعرفو شو يعني هالكلام ؟ هاد يعني انه بحياته مارح ياخد و لا قرار , لأنه مافي قرار خالي تماما من المخاطرة و مافي قرار بيجي على قياس الجميع .